Mark 5

Iesu Tiapolo Eulai'i Uma Alo'iai Kekoko

(Mateo 8:28-34; Luka 8:26-39)

1Egae kai Iesu ega imoi fou a'uai kepagai kelao mo Kadara taonina papiau'i ▼

▼Kerasene agogai keagu au'i.

keagu agogai keofau. 2Ke Iesu gaagai eapa opu aisama, fiakoa mo au aga'o tiapolo apala alogai eagu auga laai epealai emai Iesu epea apua. 3Isa laai mo eaguagu, ke kai aga'o isa tieiniai ganinagai fekegope faekaina. 4Gome kina epogai papiau i'ina auga tieiniai ima kegopei'i ke auliai ife kepaaga'i kai, isa tieini ega'ina eapau'i, ke auli ifegai auga efaiponi'i. Ke kai aga'o i'ina auga fepaapakipo auga aekainia. 5Ke egae aufa kina, kinai ke gapiai la alo'iai, ke ikuai eagaga ekapaisa efai elaoaina. Ke kepo eafii'i ifo faaga eifai'i.

6Kai i'ina auga aakai maaga elao Iesu eisa aisama, epiau elao agogai e'ualai eanife'u. 7Ke tiapolo au alogai eagu auga eagaga einaka, “Iesu, Deo ufai au'oniai Au Akaiki'a Ipauma Auga Gauga Aumu! Lau oi eemuai kapa'ina lakapaisa? Lau afoloafi apalaniau auga, Deo maagai moifa ko'ania!” eoma. 8Gome isa epainia einaka, “Tiapolo apalamu! Ega'ina auga alogai mopealai,” eoma.

9Egae kai Iesu au epa'ani penia einaka, “Oi akamu kapa'ina?”

Ke tiapolo au'i ealogai alogaina au ega'ina alogai keagu puo, eifa einaka, “Lau akau Ma'o, gome lai aumai ma'o,” eoma. 10Ke isa Iesu egoinia aeaponia ega koa ega'ina afugai faepapealai'i eoma.

11Ega'ina alogai, kainagai mo iku e'ele mapegai uma la'afouai keapa keaniani. 12Ke tiapolo ma'oai Iesu kegoinia keinaka, “Moulaimai uma ee'i alao, ke mologoainimai alo'iai amakoko,” keoma. 13Ke Iesu tiapolo elogoaini'i puo, au alogai kepealai kelao uma alo'iai kekoko. Ega aisama ega'ina uma'i au'i ma'oai mo 2000 koa i'opoga auga, poupouai kepiau kelao a'uai kegopolai kekogo.

14Ke uma kepaani'i au'i kepiau kelao taoni, ke taoni afegai keagu papiau'i ma'oai maa'iai i'ina fouga keifafoua. Ke papiau kelao kapa'ina emia auga kegaisa keoma. 15Ke kelao Iesu eegai aisama, au alogai tiapolo ealogai alogai keagu auga mino felo emia, ke tiapu ei'iuka'i egae eagu keisa. Ke ma'oai kemani'i alogaina. 16Ke au alogai tiapolo keagu auga faagagai kapa'ina emia keisa au'i, papiau maa'iai keifania, ke uma isafa ala keoma auga fou'i keifania. 17Ega aisama papiau kemani'i alogaina puo, Iesu kegoi penia e'i ago gapua'afuga keoma.

18Ke Iesu emai gaagai gaaguka eoma aisama, au alogai tiapolo eagu kai, epafelo auga Iesu egoinia fou kegalao eoma. 19Kai Iesu epamafua, ke epainia einaka, “Oi emu pagua aamu akimu ee'i molao. Ke isa maa'iai Lopia oi eemuai kapa'ina mo ekapai'i au'i, ke guamu ala eani oma epafeloiso auga foifania,” eoma. 20Ke ega'ina auga elao Taoni Ou'aga keoma auga alogai, Iesu isa faagagai kapa'ina ekapaisa auga e'ina eifafoua. Ke papiau ma'oai ega'ina a'o kelogonia aisama, kekauai alogaina keopofua.

Iesu Mae Ifiaoga Epamaunimue Ke Isafa Papiega Efelo

(Mateo 9:18-26; Luka 8:40-56)

21Ke Iesu gaagai epagai a'u apie elao pugu aisama, a'u niegai eapaega kai, la'afou akaiki'a kemai keapa lofe. 22Ke amoisa, Iudea papiau'i e'i la'afou afuga e'ima auga aga'o aka Jairus emai egae. Ke isa Iesu eisa aisama, ife fo'inai e'ualai eomukipo. 23Ke egoi kapulania einaka, “Gau ifiaoga e'ele afa'agamo agemae. Mogafegafe momai imamu laagai moogeaua ega koa felo agemia ageagu,” eoma.

24Ega puo Iesu au ega'ina fou kelao. Ke elao alogai la'afou akaiki'a Iesu muninai kepea kepi'ifu kelaoaina. 25Ega'ina la'afouga alogai papie aga'o inipo 12 alogai ifamomogu isafaga eafiia auga isafa eapa. 26Ke isa toketa ma'o ee'i elao, ke isa kapa ma'o kepeniia faaga kepakiekie alogaina. Ke ega amu ma'oai toketa faaga'iai epafua afe'aina. Ega mo ganinagai isa aepafelo kai, ega isafa ega'ina elifu elaoaina. 27Kai isa Iesu fouga elogo aisama, la'afouai Iesu muninai elao afe tiapuga eafi opogaina. 28Gome ifo alogai einaka, “Lau isa afe tiapuga mo alaafi opogaina koa aisama, felou alamia,” eoma. 29Ke fiakoa mo ifa eake auga eapakipo. Ke ifo mo faagagai ega kiekie epealai efua auga gamuga eoponia.

30Ke Iesu fiakoa mo faagagai isapu epealai auga elogo puo, la'afou alogai e'afoaipini epa'ani einaka, “Kaisau lau afeu tiapuga eafi opogaina?” eoma.

31Kai Iesu ega imoi isa kepainia keinaka, “Papiau ma'o kela'afou faagamu kekagu opogaina loisa'i kai, lopa'ani kaisau lau e'u tiapu eafi opogaina looma?” keoma.

32Kai Iesu maaga egoa aisoge kaisau ekapaisa auga gaisa paisa eoma. 33Ke papie kapa'ina faagagai emia auga elogo puo, emani'i, maipiguguga mo emai e'ualai Iesu ife fo'inai eomukipo kai, maagai kapa'ina faagagai ko'a mo emia auga eifania. 34Ke Iesu isa epainia einaka, “Gauagai, oi emu pako'a kainai pau felomu lomia. Gagaoai molao, ke i'ina kiekie gapua'afu umanio mo,” eoma.

35Iesu enini'ani laolao kai, au isa'i Jairus Iudea papiau'i e'i la'afou afuga e'ima auga ega e'ai kemai kepainia keinaka, “Oi gaumu ifiaoga emae efua. Ega puo Pamalele Auga folopaafipugua,” keoma.

36Kai Iesu isa aina'i elogonia aisama, la'afou afuga e'ima auga epainia einaka, “Folomani'i kai mopako'ania mo,” eoma.

37Iesu kai aga'o aelogoaina isa muninai aelao kai Peto, James, ke akina Ioane mo fou kelao. 38Ke kelao la'afou afuga e'ima auga ega e'ai aisama, papiau ma'o keapepe akaiki'a ke kepapinapina eisa'i. 39Ke ea'i ekoko aisama epa'ani peni'i einaka, “Kapa'ina apepega, ke pinapina opa'aua? Imoi aemae, ekae efeu,” eoma. 40Kai papiau ifiao emae efua auga kelogo puo, Iesu kepa'aua kea'alaina.

Kai isa papiau ma'oai epapealai'i afegai aisama, ifiao ina, ama, ke ega imoi isa fou egae keapa au'i mo ifiao eka afugai kekoko. 41Ke Iesu ifiao imagai eafi kai epainia einaka, “Talita kumi,” eoma. Talita kumi i'a mala'aisai auga, ‘Ifiao e'elemu lau lapainio, mo'ue!’ 42Ke fiakoa mo ifiao e'ue epea aisoge. Gome ega'ina ifiaoga inipoga 12. Ke ifiao ina ama ke Iesu ega imoi fou iina koa emia keisa aisama, kekauai alogaina. 43Kai Iesu isa epaini kapulani'i kapa'ina emia auga kai aga'o maagai fakeifania eoma. Ke imoi ina ama epaini'i kapa aga'o imoi kegapenia gaania eoma.